朋友首日封: 06.2006

6.27.2006

搵笨的優惠

三間巴士公司在七月起
在三條海底隧道九龍入口
提供轉乘優惠俾去港島的乘客
其中在紅隧
轉乘第二程車
只可慳三個半
以大部分過海車票價八個九計
減三個半後
即係五個四
同過海後票價一樣
換句話來講
巴士公司的所謂優惠
只不過係免卻乘客
過左海後要搵站的麻煩
乘客一樣要俾五個四
好搵笨
冇著數
巴士公司講到好皇恩浩蕩咁
好心佢就可以同價免費轉乘啦
起碼變相有「間接」的過海車來往各區嘛

新城四子

本台應該係全行男記者比例最高的一間傳媒機構
達到百分之一百
如果仲未認得晒邊四個
可以下面指引做參考
咁你就會知邊個打邊個：
一個結左婚
一個就結婚
一個未結婚
一個唔結婚

6.19.2006

北京四天行

五號o個個禮拜
返工返到星期四
星期五就上京玩四日
但事前就咩都冇PLAN
除左係出發前一個星期前先買機票之外
仲要係原本星期六出發
因特價機票的指定離港時間唔合心水
而要提前一日出發

星期四晚仲同緊兩個電台駐京老友
傾緊第二日我到左之後去邊度玩之際
就突然收到消息話宜昌有車禍
佢地要落去
唔可以招呼我
唉！真係人算不如天算
自己買的機票又唔可以改期
唯有照上
結果好彩多得兩位老友留低口訊俾亞視阿DULL
話我上來
叫佢好好招呼我
要多謝阿DULL幫我BOOK左間平平地又幾乾淨的賓館
一百八十五蚊一晚
仲要係雙人房
不過一個人睏
就唔係咁好受

放低D行李之後
就去搵野食
賓館在前門
所以沿住前門大街行
但周圍都圍晒板
好多舖頭都執晒笠
連出名的開封第一包
都唔知搬左去邊
○八年搞個奧運
就將北京搞到天翻地覆
聽講就連有北京特色的胡同都要被逼拆卸

好彩大柵欄仲o係度
入左去搵野食
唔知係咪三點幾太晏
好多食肆都冇開
結果入左一間道地的麵店叫左碗牛肉麵
盛惠四個大洋
雖然唔好食
冇牛肉味
D麵仲要唔係好稔
不過咁平就算啦

食完繼續向西行
經過琉璃廠
行左個圈
冇野買到
不過D屋就幾有特色

原本想去和平門的中國郵票博物館
但去到搵唔到
應該係搬左
七年前又去唔到
今次亦都去唔到
可惜…

都差唔多俟晚
約阿DULL在王府井食飯
去左東方新天地間豆腐莊食
叫左幾碟送都食唔晒

食完阿DULL搭的士返屋企
我就揀行返前門
原來由王府井行返去都幾遠
不過就可以順便睇埋天安門同人民大會堂的夜景

第二朝睏到十二點先離開賓館
去左樓下永和食小籠包
之後都冇諗過去邊

在我冇買過
而身上亦冇帶一本合比例的北京地圖之下
我竟然識搭巴士去在黃寺大街的馬甸郵票市場
呢個市場在北京數一數二
售價可以話係全國的指標

其實我都係周圍睇下
買的野就唔算多
包括以郵資面值六分一的價錢
買左二十張明信片
即係兩蚊

又以十蚊買左兩套北京風光的郵資已付明信片
但每套郵資其實價值係六蚊
真係跳樓貨

逗留左兩個鐘
再搭巴士去什剎海同後海
由於正值係世界杯
周圍的酒吧都搬大電視出來播球賽

行到又係食飯時間
CALL左阿DULL陪我食
在荷花市場的一間客家菜食肆
叫左三個送
又係食唔晒

行左陣
佢自己踩單車返歸
我就行返過後海的鼓樓
搭五號返前門
之後就同當晚由宜昌飛返北京的智偉、阿洵同泰仔食宵夜

第三日行程
一行七人去石景山遊樂園玩
玩左好多機動遊戲
有好多真係抄足迪士尼
最好玩係風車機
FING到頭都甩
而智偉同泰仔就手拖手玩空中飛人

在莫斯科餐廳食晚飯
八個人
每人百幾蚊
我覺得都幾貴
不過裝修真係唔錯

食完之後上左其中一個駐京行家度打牌
今次係我咁大個仔第二次打牌
結果四圈輸左六十四蚊

最後一日
睏到十點幾起身
去左秀水街買野
睇中左個印有毛主席同「為人民服務」字樣的布袋
個檔主一開價百五蚊
當我傻架
後尾佢知衰
改口五十蚊
我都冇理
佢再減到四十、再三十
而且仲拎第二個款俾我睇
但就話呢個大D
要四十蚊
我就話我會買兩個
收六十蚊啦
佢話唔得
結果六十五蚊兩個成交

智偉、阿洵做完衛生部記者會
一齊去時時樂食沙律當晏晝
食完跟佢地去記協辦證
再行埋西單書城
買左本集郵書
「現代集郵指南」
希望增進自己對做郵集的知識

回航機原定七點五十分起飛
咁就搭五點三由西單開出的機場巴士
點知塞車
六點半先到機場
好快咁就CHECK IN同過關
點知因為有雷雨
要DELAY
打亂左本身的計劃
原本十一點幾LAND
結果凌晨十二點半先到香港
好彩可以好快過關
趕到一點的A11尾車巴士返北角
返到屋企已經係差唔多兩點了
咁就結束左四日的行程
第二朝一早繼續開工

6.18.2006

深圳半天行

過去兩個星期
差不多有一半的日子是不在香港的
上個星期二
在政府總部等完行政會議
雖然當日結果冇行會
食白果
之後就去做左一單勞工處講暑期工求職陷阱
單野十一點先開
但我十點十個字去到時
已經坐無虛席
見到好多台都係一拖一
所以一張長長的檯
一早已經被行家霸晒
自己只好逼在一角
而且個IO見好似咁齊人
未夠十一點個記者會就已經開了

做完個PC
返左公司
正諗緊要PACK之際
採主來電
話碧桂園單劫車案破左案
即刻上深圳
話公安部下晝兩點半開PC

心諗
在中環
要上深圳
最快途徑都係搭地鐵在尖沙咀站轉東鐵上羅湖
之後再打的
結果都好好彩
兩點半前去到
但在門口已經有市新聞辦的人招呼
登上準備好的小巴
以為去第二度
點知原來就係車入去眼前的建築物咁短路程
好心就唔好「咁好招呼」啦
等我一早入去SET咪好過

開完PC
時間四點
打返落香港問想在深圳包定返香港包
老細話由我決定
咁我就話返紅磡包
我在火車上寫好稿
一返到STUDIO就V
又俾我趕到六點出頭帶

朋友首日封